Cari ilin noyabr ayından etibarən Facebook sosial şəbəkəsi öz istifadə şərtləri, fərdi məlumatlardan istifadə siyasəti və "cookie" fayllarından istifadə siyasətini dəyişməsi barədə xəbərdarlıqlar yaymağa başlamışdır. Fərdi məlumatlardan istifadə siyasətində istifadəçilərin təhlükəsizliyinin təmin olunması ilə bağlı bir sıra maddələrlə yanaşı, onları narahat edə biləcək dəyişiklik də mövcuddur.

Belə ki, 1 yanvar 2015-ci il tarixindən etibarən sosial şəbəkə öz istifadəçilərinə heç bir xəbərdarlıq etmədən onlara məxsus məlumatların üçüncü tərəfə - reklam şirkətləri, operatorlar və digər maraqlı tərəflərə ötürülməsi barədə qərar qəbul etmişdir. Sosial şəbəkənin rəhbərliyi bütün istifadəçilərə xəbərdarlıq göndərməklə hal-hazırda bu barədə onları məlumatlandırır. Siyasətdəki bu önəmli dəyişikliklə razı olmayan istifadəçilər bu sosial şəbəkədən istifadəni dayandıra bilərlər.

Elektron Təhlükəsizlik Mərkəzi tövsiyə edir ki, ümumiyyətlə sosial şəbəkələr və  hər hansı veb saytlarda qeydiyyatdan keçərkən onların təhlükəsizlik siyasəti və fərdi məlumatlardan istifadə şərtləri ilə əvvəlcədən tanış olasınız. Fərdi məlumatlarınızın konfidensiallığının təmin olunmaması və ya başqa tərəflərə ötürülməsi barədə şərt mövcud olduğu halda həmin veb saytlarda qeydiyyatdan keçməyiniz tövsiyə olunmur.