QAYNAR XƏTT 1654

Xəbərdarlıqlar

Diqqət! WannaCry təhlükəsi

12 May 2017

2017-ci il mayın 12-də kiber məkanda qlobal virus epidemiyası baş vermişdir.

İlkin məlumatlara əsasən kompüter qurğularının və informasiya sistemlərinin fəaliyyətinə ciddi təsir edən virus dünyanın 99 ölkəsində 75000-dən çox kompüter sistemində yayılmışdır. WannaCry adlandırılmış bu virusun əsasən  Windows əməliyyat sistemlərindəki şəbəkədə faylların paylanması protokolunda mövcud olan boşluqdan istifadə etməsi ilə yayıldığı aşkarlanmışdır.

Yoluxmuş kompüterlərdəki bütün növ faylları – sənədləri, şəkilləri, videoları, məlumat bazalarını şifələyib, kompüterin fəaliyyətinə maneə yaradılır və deşifrələnmə üçün müəyyən məbləğ tələb edilir.

Microsoft şirkəti aşkar olunmuş boşluğun aradan qaldırılması ilə bağlı 14 mart 2017-ci il tarixində “Microsoft Security Bulletin MS17-010 – Critical” adlı yenilənmə dərc etmişdir.

Hazırda müxtəlif antivirus proqramlarında virusa qarşı müvafiq təzələnmələr aparılmışdır.

Kompüter sistemlərinin təhlükədən qorumağınız üçün Elektron Təhlükəsizlik Mərkəzi aşağıdakıları tövsiyə edir:

  • İstifadə etdiyiniz kompüter və informasiya sistemlərinizdəki Windows əməliyyat sistemlərində mövcud olan boşluqların aradan qaldırılması üçün dərhal təzələnmə (“patch”ın yüklənməsi və quraşdırılması) aparmaq;
  • E-poçt vasitəsi ilə göndərilən naməlum faylları, tanış olmayan hər hansı digər mənbəyə keçidi  klikləməmək;
  • Vacib sənədlərin ehtiyat nüsxəsini (backup) yaratmaq;
  • Aktiv və antivirus bazası aktual olan anti-virusdan isitfadə etdiyinizdən əmin olmaq;
  • Əgər hər hansı antivirus proqramı istifadə edilmirsə, Microsoft Defender antivirus proqramından istifadə etmək;
  • Antivirus proqram vasitəsilə kompüterinizdə mövcud ola biləcək yoluxmaları yoxlamaq;
  • İnternetdən istifadə zamanı təhlükəsizlik qaydalarına riayət etmək;
  • Baş verilmiş yoluxmalar barədə və ya əməli yardıma ehtiyac olduqda Mərkəzə müraciət etmək.

Təhlükə ilə üzləşdiyiniz halda Elektron Təhlükəsizlik Mərkəzinin 1654 qaynar xəttinə zəng etməyiniz və ya team@cert.az elektron ünvanına yazmağınız tövsiyə olunur.