QAYNAR XƏTT 1654

“İnternet medianın informasiya təhlükəsizliyi” mövzusunda dəyirmi masa keçirildi

05 Feb 2014


Tədbiri giriş sözü ilə açan Azərbaycan İnternet Forumunun rəhbəri Osman Gündüz deyib ki, prezident tərəfindən dövlət və qeyri-dövlət sektorunda informasiya təhlükəsizliyi ilə bağlı qurumlar yaradılıb: “Qeyri-dövlət sektorunda informasiya təhlükəsizliyi ilə bağlı Rabitə və İnformasiya Texnologiyaları Nazirliyi yanında Elektron Təhlükəsizlik Mərkəzi təsis edilib”.Bu gün Azərbaycan İnternet Forumu, Rabitə və İnformasiya Texnologiyaları Nazirliyi yanında Elektron Təhlükəsizlik Mərkəzi və Mətbuat Şurasının birgə təşkilatçılığı ilə “İnternet medianın informasiya təhlükəsizliyi” mövzusunda dəyirmi masa təşkil edilib.

Prezident Administrasiyası ictimai-siyasi məsələlər şöbəsinin sektor müdiri Vüqar Əliyev deyib ki, qloballaşan dünyada internet medianın rolu artır. Dövlət siyasətinin prioritetlərindən biri də məhz informasiyanın azad dövriyyəsinin təmin edilməsi, bu prosesin əsas aləti kimi KİV-in sərbəst fəaliyyətinə zəruri şəraitin yaradılmasıdır: “Hazırda ölkə üzrə internet istifadəçilərinin sayı əhalinin 70 faizini təşkil edir. Son illər genişzolaqlı sürətli internet istifadəçilərinin sayı 50 faizə yaxınlaşıb. Bu gün Azərbaycanda siyasi, iqtisadi, sosial, mədəni və digər sahələri əhatə edən 300-ə yaxın aktiv portal, xəbər saytı və internet informasiya resursu fəaliyyət göstərir. Qarşıda duran vəzifələrdən biri bütövlükdə dövlətin informasiya təhlükəsizliyinin, eləcə də mili internet məkanının, onlayn medianın təhlükəsizliyinin təmin edilməsidir”.

V.Əliyevin sözlərinə görə, məsələyə real yanaşdıqda, görürük ki, mili internet məkanının, onlayn medianın təhlükəsizliyinin təmin edilməsi bilavasitə dövlətin informasiya təhlükəsizliyinin tərkib hissəsidir: “Çünki hazırda inkişaf etməkdə olan ölkələrdə həqiqi məlumatların vaxtında verilməsi daxili və xarici siyasət məsələləri ilə bağlı operativ qərarların qəbuluna təsir göstərir. Belə olduqda mili KİV-lərin, onlayn medianın təhlükəsiz şəraitdə funksionallığının təmin edilməsi dövlət üçün böyük əhəmiyyət kəsb edir, onun təhlükəsizliyinin vacib elementi qismində çıxış edir. İnformasiya təhlükəsizliyi yalnız dövlətin üzərinə düşən vəzifə deyil. Biz azad cəmiyyətdə yaşayırıq, heç kim medianın informasiya yaymaq hüququnu məhdudlaşdıra bilməz. Lakin bu, heç də medianın məsuliyyətdən kənarda qalması kimi anlaşılmamalıdır. Dövlət media üçün təhlükəsiz şərait yaratdığı kimi, media da dövlətin təhlükəsizliyini, ümummilli məsələləri daim diqqətdə saxlamalıdır. Bəzən hansısa yoxlanılmamış, qərəzli, yaxud sifariş xarakterli informasiyalar ölkədə gedən proseslərin, konkret hadisələrin mahiyyətini təhrif edir, ictimaiyyəti çaşdırmağa xidmət göstərir. Bəzi hallarda isə bu, dövlətlərarası münasibətlərə mənfi təsir göstərir, əlaqələrə zərbə vurur. Bu məsələ Azərbaycan kimi müharibə şəraitində yaşayan, ərazisi işğal olunan ölkələr üçün daha çox aktualdır. Deməli, həm dövlətin informasiya təhlükəsizliyi, həm də onlayn medianın təhlükəsiz mühitdə fəaliyyəti dövlət və medianın, bütövlükdə isə bütün cəmiyyətin birgə səyi nəticəsində əmələ gələn məsələdir”.

Mətbuat Şurasının sədri Əflatun Amaşov internetin meydana gəlməsi ilə dünyada fikirləri dəyişdiyini nəzərə çatdırıb: “Azərbaycanda təkcə keçən il 170 xəbər portalı yaranıb. Jurnalistlərin sonuncu qurultayında 3 nəfər internet medianın nümayəndəsi Mətbuat Şurasının üzvü seçilib. Mətbuat Şurası internet media ilə bağlı komissiya da yaradıb. 2014-cü ili informasiya ili elan etmişik və bu il internet media ilə bağlı çoxsaylı tədbirlər keçirməyi planlaşdırırıq”.

Ə.Amaşov yazılı mediada etik normaları pozmağa meyilli şəxslərin internet resurslarda fəaliyyətə başladığını və bununla bağlı Mətbuat Şurasına kifayət qədər şikayətlər daxil olduğunu açıqlayıb: “Buna görə də internet media orqanları Mətbuat Şurasına üzv qəbul edilir. Artıq 10 internet media orqanı üzv qəbul edilib, hazırda baxılmamış 30 ərizə var”.

Rabitə və İnformasiya Texnologiyaları Nazirliyi yanında ETM-in rəhbəri Faiq Fərmanov hesab edir ki, məlumat təhlükəsizliyi mili təhlükəsizliyin tərkib hissəsi kimi qiymətləndirilməlidir. "Mərkəz fəaliyyətə başladığı 1 ilə yaxın müddətdə bu sahədə bir sıra işlər görüb. Bunlara misal olaraq beynəlxalq çərçivədə və yerli müstəvidə bir sıra şirkətlərlə əməkdaşlıqların reallaşdırılması, ölkənin elektron təhlükəsizliklə bağlı nüfuzlu tədbirlərdə təmsil olunması, İnformasiya təhlükəsizliyi insidentlərinin qarşısının alınması və nəticələrinin aradan qaldırılması üçün tövsiyyələrin geniş ictimaiyyətə çatdırılması, informasiya təhlükəsizliyi ilə bağlı təlim və seminarların keçirilməsi,  Elektron Təhlükəsizlik Mərkəzinin rəsmi veb resursunun, 1654 qaynar xəttinin istifadəyə verilməsini göstərmək olar.

Elektron Təhlükəsizlik Mərkəzi bundan sonra da fəaliyyətində ölkədə bu sahənin inkişafını əsas götürəcək və bu istiqamətdə müvafiq addımlar atacaq. Media nümayəndələri olan Sizlərin də bu işdə bizə yardımçı olacağınıza, informasiya təhlükəsizliyi sahəsində cəmiyyətin maarifləndirilməsində bizim quruma dəstək göstəcəyinizə ümidvarıq. Bu baxımdan bu günkü tədbiri Elektron Təhlükəsizlik Mərkəzi ilə media orqanları arasında əməkdaşlıq görüşünün əsası kimi də qəbul etmək olar" - deyə F.Fərmanov bildirib.

ETM-in sektor müdiri Rəşad Əliyev saytların təhlükəsizliyinin mühafizəsi ilə bağlı xüsusi təqdimatla çıxış edib.

Daha sonra "dəyirmi masa" görüş iştirakçılarını maraqlandıran suallar ətrafında müzakirələrlə davam edib.